”ഏഴ് നിരപരാധികളാണ് അന്ന് കൊല്ലപ്പെട്ടത്. ഗ്രാമത്തിലെ മറ്റ് വീടുകളിലേക്ക് കൂടി കയറി വലിയൊരു കൂട്ടക്കൊല നടത്താനായിരുന്നു ഭീകരരുടെ പദ്ധതി.”

ജമ്മു കശ്മീരിലെ മലയോര മേഖലകളിലും അതിർത്തി ഗ്രാമങ്ങളിലും തീവ്രവാദം ശക്തമായ സാഹചര്യത്തിലാണ് വില്ലേജ് ഡിഫൻസ് കമ്മിറ്റികൾ രൂപം കൊള്ളുന്നത്.

കുന്നിൻചെരിവുകളിലെ ഒറ്റപ്പെട്ട വീടുകളിൽ കയറി ഭീകരർ ആസൂത്രിതമായ കൂട്ടക്കൊലകൾ നടത്താൻ തുടങ്ങിയപ്പോൾ, കഠിനമായ ഭൂപ്രകൃതി കാരണം സുരക്ഷാസേനയ്ക്ക് എല്ലാ സ്ഥലങ്ങളിലും ഒരേസമയം എത്തിച്ചേരുക അസാധ്യമായിരുന്നു.

​ഈ സാഹചര്യത്തിലാണ് 1995-ൽ ജമ്മു കശ്മീർ പോലീസും ഇന്ത്യൻ സൈന്യവും ചേർന്ന് ഗ്രാമീണർക്ക് സ്വയം പ്രതിരോധത്തിനായി ആയുധങ്ങൾ നൽകാൻ തീരുമാനിച്ചത്.

ജാതി-മത ഭേദമന്യേ നാട്ടിലെ സന്നദ്ധപ്രവർത്തകരെ ചേർത്ത് വില്ലേജ് ഡിഫൻസ് കമ്മിറ്റികൾ (VDC) രൂപീകരിച്ചു. ഇവർക്ക് അടിസ്ഥാന ആയുധ പരിശീലനവും റൈഫിളുകളും നൽകി.

സൈന്യമെത്തുന്നതുവരെയുള്ള നിർണ്ണായക സമയത്ത് ഭീകരരെ പ്രതിരോധിക്കുക, സുരക്ഷാസേനയുടെ കണ്ണും കാതുമായി പ്രവർത്തിച്ച് കൃത്യമായ വിവരങ്ങൾ നൽകുക എന്നിവയായിരുന്നു ഇവരുടെ ചുമതല.

​ഒരിക്കൽ, ജമ്മുവിലെ രജൗരി ജില്ലയിലുള്ള ധാംഗ്രി ഗ്രാമത്തിൽ ഭീകരർ അതിക്രമിച്ചു കയറി സാധാരണക്കാർക്ക് നേരെ വെടിയുതിർത്ത സംഭവമുണ്ടായി.

ഏഴ് നിരപരാധികളാണ് അന്ന് കൊല്ലപ്പെട്ടത്. ഗ്രാമത്തിലെ മറ്റ് വീടുകളിലേക്ക് കൂടി കയറി വലിയൊരു കൂട്ടക്കൊല നടത്താനായിരുന്നു ഭീകരരുടെ പദ്ധതി. എന്നാൽ അവിടെയുണ്ടായിരുന്ന ബാൽ കൃഷ്ണൻ എന്ന വി.ഡി.സി അംഗം തന്റെ പക്കലുണ്ടായിരുന്ന റൈഫിളുമെടുത്ത് ഭീകരർക്ക് നേരെ വെടിയുതിർത്തു.

ഗ്രാമീണർ ആയുധവുമായി ചെറുത്തുനിൽക്കുന്നു എന്ന് മനസ്സിലാക്കിയ ഭീകരർ ഭയന്നോടുകയും, അനേകം ജീവനുകൾ അവിടെ രക്ഷപ്പെടുകയും ചെയ്തു.

ഗ്രാമീണരുടെ പക്കൽ തോക്കുകളുണ്ടെന്നും ശക്തമായ പ്രതിരോധം നേരിടേണ്ടി വരുമെന്നും മനസ്സിലാക്കിയ ഭീകരർ, കൂടുതൽ വീടുകളിലേക്ക് ആക്രമണം വ്യാപിപ്പിക്കാതെ അവിടെനിന്ന് പിന്തിരിഞ്ഞോടാൻ നിർബന്ധിതരായി.

ബാൽ കൃഷ്ണന്റെ ആ ധീരതയാണ് അന്ന് ആ ഗ്രാമത്തിലെ മറ്റ് നൂറുകണക്കിന് ആളുകളുടെ ജീവൻ രക്ഷിച്ചത്.

​കശ്മീർ ലെഫ്റ്റനന്റ് ഗവർണർ മനോജ് സിൻഹ ധാംഗ്രി ഗ്രാമം നേരിട്ട് സന്ദർശിക്കുകയും ബാൽ കൃഷ്ണനെ കണ്ട് അദ്ദേഹത്തിന്റെ ധീരതയെ അഭിനന്ദിക്കുകയും ചെയ്തു.

കഠിനമായ സാഹചര്യത്തിൽ ഒരു സൈനികനെപ്പോലെ ചിന്തിച്ച് നാടിനെ രക്ഷിച്ചതിന് ജമ്മു കശ്മീർ പോലീസും ഇന്ത്യൻ സൈന്യവും അദ്ദേഹത്തെ പ്രത്യേകം ആദരിച്ചു.

​രാജ്യത്തിന്റെ സുരക്ഷാ നയത്തിൽ പോലും വലിയ സ്വാധീനം ചെലുത്തിയ സംഭവമായിരുന്നു ഇത്. ബാൽ കൃഷ്ണൻ നടത്തിയ ഈ പ്രതിരോധത്തിന് ശേഷമാണ്, അതിർത്തി ഗ്രാമങ്ങളിൽ വില്ലേജ് ഡിഫൻസ് ഗാർഡുകൾക്ക് കൂടുതൽ ആധുനിക ആയുധങ്ങളും, കൃത്യമായ പരിശീലനവും, വേതനവും നൽകിക്കൊണ്ട് കേന്ദ്ര ആഭ്യന്തര മന്ത്രാലയം ഈ സംവിധാനത്തെ അടിയന്തരമായി പുനരുജ്ജീവിപ്പിച്ചത്.

​പഴയ സംവിധാനത്തിൽ നിന്ന് വ്യത്യസ്തമായി വി.ഡി.ജി അംഗങ്ങൾക്ക് കൃത്യമായ സാമ്പത്തിക സുരക്ഷിതത്വവും ആധുനിക പരിശീലനവും പുതിയ സ്കീം ഉറപ്പാക്കുന്നു.

Article : വില്ലേജ് ഡിഫൻസ് ഗാർഡുകൾ (VDG)
സ്വന്തം ലേഖകൻ