റൊമാനിയിലെ ‘ക്രിസ്റ്റ്യൻ’

പറമ്പിൽ കൃഷിക്കും മറ്റാവശ്യങ്ങൾക്കുമായി നിർമ്മിച്ച കുഴൽക്കിണറിൽ
​നിർഭാഗ്യവശാൽ, ​ഗബ്രിയേൽ റൂയിയു എന്ന മൂന്ന് വയസ്സുകാരൻ വീഴുകയും , 15 മീറ്റർ ആഴമുള്ള, വളരെ വ്യാസം കുറഞ്ഞ ആ പൈപ്പിന്റെ അടിത്തട്ടിൽ കുടുങ്ങിപ്പോകുകയും ചെയ്തു.

​വിവരമറിഞ്ഞ് നാട്ടുകാരും ഫയർഫോഴ്സും ഉടനടി സ്ഥലത്തെത്തി. 11 മണിക്കൂറിലധികം നീണ്ട തീവ്രശ്രമങ്ങളാണ് അവിടെ നടന്നത്.

വലിയ മണ്ണുമാന്തി യന്ത്രങ്ങളും ട്രാക്ടറുകളും ഉപയോഗിച്ച് കുഴൽക്കിണറിന് സമീപത്തെ മണ്ണുമാറ്റി കുട്ടിയെ പുറത്തെടുക്കാൻ രക്ഷാപ്രവർത്തകർ ശ്രമിച്ചെങ്കിലും, പൈപ്പിന്റെ ഇടുങ്ങിയ ഘടനയും മണ്ണൊലിപ്പ് സാധ്യതയും കാരണം ആ ശ്രമങ്ങളെല്ലാം പരാജയപ്പെട്ടു.

​കുഞ്ഞിന്റെ ജീവനെക്കുറിച്ചുള്ള പ്രതീക്ഷകൾ മങ്ങിത്തുടങ്ങി. ​ഈ സങ്കീർണ്ണമായ സാഹചര്യത്തിലാണ് സ്കൂൾ വിട്ട് വരുന്ന ക്രിസ്റ്റ്യൻ മരിയൻ ബെചേനു എന്ന 14 വയസ്സുകാരൻ രക്ഷാപ്രവർത്തകരുടെ മുന്നിലേക്ക് കടന്നുവരുന്നത്.

മെലിഞ്ഞ ശരീരപ്രകൃതിയുള്ള തനിക്ക് ആ പൈപ്പിലൂടെ ഉള്ളിലേക്ക് ഇറങ്ങാൻ കഴിയുമെന്ന് അവൻ ഉറപ്പിച്ചു പറഞ്ഞു.

ആദ്യം രക്ഷാപ്രവർത്തകർ ഇതിന് വിസമ്മതിച്ചെങ്കിലും, ഉള്ളിൽ നിന്ന് വരുന്ന കുഞ്ഞിന്റെ വിലാപം കേട്ടപ്പോൾ ക്രിസ്റ്റ്യൻ പിന്മാറാൻ തയ്യാറായില്ല. ഒടുവിൽ അവന്റെ ധീരതയ്ക്ക് മുന്നിൽ അധികൃതർ സമ്മതം മൂളി.

​ക്രിസ്റ്റ്യന്റെ കാലുകളിൽ ശക്തമായ കയറുകൾ സുരക്ഷിതമായി കെട്ടി, തലകീഴായ നിലയിൽ അവനെ സാവധാനം ആ ഇരുണ്ട പൈപ്പിലേക്ക് ഇറക്കിവിട്ടു. ശ്വാസമെടുക്കാൻ പോലും ബുദ്ധിമുട്ടുള്ള ആ ഇടുങ്ങിയ ആഴങ്ങളിലേക്ക് അവൻ ധൈര്യപൂർവ്വം ഇറങ്ങിപ്പോയി.

​മിനിറ്റുകൾക്കകം കുഞ്ഞിന്റെ അരികിലെത്തിയ ക്രിസ്റ്റ്യൻ അവനെ സുരക്ഷിതമായി കൈകളിൽ കോരിയെടുക്കുകയും മുകളിലേക്ക് ഉയർത്താനുള്ള സിഗ്നൽ നൽകുകയും ചെയ്തു. 15 മണിക്കൂറോളം മരണത്തോട് പൊരുതിയ കുഞ്ഞിന് അതൊരു പുനർജന്മമായിരുന്നു.

“ഉള്ളിലേക്ക് ഇറങ്ങുമ്പോൾ എനിക്ക് പേടിയുണ്ടായിരുന്നു, പക്ഷേ ആ കുഞ്ഞിന്റെ കരച്ചിൽ കേട്ടപ്പോൾ പിന്തിരിയാൻ തോന്നിയില്ല.” – ക്രിസ്റ്റ്യൻ

2013- ലെ ​ഈ സംഭവത്തോടെ റൊമാനിയയിലെ ദേശീയ ഹീറോയായി ക്രിസ്റ്റ്യൻ മാറി. അന്ന് ആ ധീരതയ്ക്ക് രാജ്യം അവനെ ആദരിക്കുകയും അവന് താമസിക്കാൻ പുതിയൊരു വീട് സമ്മാനമായി നൽകുകയും ചെയ്തു.

Article : റൊമാനിയിലെ ‘ക്രിസ്റ്റ്യൻ’
സ്വന്തം ലേഖകൻ