ഉറുമ്പുകളുടെ വലിയ ലോകം

മനുഷ്യരേക്കാളും അച്ചടക്കത്തോടെ സംഘടിതമായി ജീവിക്കുന്നവരാണ് ഉറുമ്പുകളെന്ന് പറഞ്ഞാൽ തെറ്റാകില്ല.

ഉറുമ്പുകളുടെ സോഷ്യൽ സ്ട്രക്ചർ എങ്ങനെയാണെന്ന് നോക്കാം. പ്രധാനപ്പെട്ടത് റാണി ഉറുമ്പാണ്. വലിപ്പം കൂടിയ ഇവയുടെ ഒരേയൊരു ജോലി മുട്ടയിടുക എന്നത് മാത്രമാണ്. വർഷങ്ങളോളം ഇവ ജീവിച്ചിരിക്കും.

​റാണിയുമായി ഇണചേരുക എന്നത് മാത്രമാണ് ആൺ ഉറുമ്പുകളുടെ ലക്ഷ്യം. അതിനുശേഷം ഇവ പെട്ടെന്ന് തന്നെ ചത്തുപോകുന്നു.

ചിറകില്ലാത്ത പെൺഉറുമ്പുകളാണ് വേലക്കാരും പടയാളികളും. ഭക്ഷണം ശേഖരിക്കുക, മുട്ടകളെയും കുഞ്ഞുങ്ങളെയും നോക്കുക, കൂട് നിർമ്മിക്കുക, ശത്രുക്കളിൽ നിന്ന് കോളനിയെ സംരക്ഷിക്കുക എന്നിവയെല്ലാം ഇവരുടെ ചുമതലയാണ്.

​ഉറുമ്പുകൾക്ക് സംസാരിക്കാൻ കഴിയില്ലെങ്കിലും അവ വളരെ ഫലപ്രദമായി ആശയവിനിമയം നടത്തുന്നു. ‘ഫെറമോൺ’ എന്നൊരു പ്രത്യേക രാസവസ്തു പുറപ്പെടുവിച്ചാണ് ഇത് സാധ്യമാകുന്നത്.

​ഒരു ഉറുമ്പ് ഭക്ഷണം കണ്ടെത്തിയാൽ, അത് തിരികെ കൂട്ടിലേക്ക് പോകുന്ന വഴിയിൽ ഈ രാസവസ്തു തളിക്കുന്നു. മറ്റുള്ള ഉറുമ്പുകൾ തങ്ങളുടെ സ്പർശിനികൾ ഉപയോഗിച്ച് ഈ മണം പിടിച്ച് കൃത്യമായി ഭക്ഷണമുള്ള സ്ഥലത്ത് എത്തിച്ചേരുന്നു. ഉറുമ്പുകൾ വരിവരിയായി പോകാൻ കാരണവും ഇതാണ്.

​​ആഹാരത്തിന്റെ കാര്യം വന്നാൽ ഉറുമ്പുകൾ ദീർഘവീക്ഷണമുള്ളവരാണ്. മഴക്കാലത്തോ ശീതകാലത്തോ പുറത്തിറങ്ങാൻ കഴിയില്ലെന്ന് മുൻകൂട്ടി കണ്ട്, വേനൽക്കാലത്ത് തന്നെ അവ ഭക്ഷണം ശേഖരിച്ച് കൂട്ടിൽ സൂക്ഷിക്കുന്നു.

സ്വന്തം ശരീരഭാരത്തിന്റെ 20 മുതൽ 50 ഇരട്ടി വരെ ഭാരമുള്ള വസ്തുക്കൾ ചുമക്കാൻ ഉറുമ്പുകൾക്ക് സാധിക്കും.

​മണ്ണിനടിയിലും, മരപ്പൊത്തുകളിലും, ഇലകൾ നെയ്തുമെല്ലാമാണ് ഉറുമ്പുകൾ കൂടുണ്ടാക്കുന്നത്. മണ്ണിനടിയിലെ കൂടുകൾക്ക് പുറമെ നിന്ന് നോക്കിയാൽ ചെറിയ മൺകൂനകൾ മാത്രമായേ തോന്നൂ. എന്നാൽ അതിനുള്ളിൽ മുട്ടകൾ സൂക്ഷിക്കാനും, രാജ്ഞിക്കും, ഭക്ഷണ സംഭരണത്തിനുമായി വ്യത്യസ്തമായ മുറികൾ അവ നിർമ്മിച്ചിട്ടുണ്ടാകും.

വലിപ്പത്തിൽ വളരെ ചെറുതാണെങ്കിലും കൃത്യമായ ആസൂത്രണവും, വിഭജനവും, പരസ്പര സഹകരണവും ഒക്കെയുള്ള ഒരു വലിയ സാമ്രാജ്യമാണ് ഓരോ ഉറുമ്പ് കൂട്ടിലുമുള്ളത്.

Article : ഉറുമ്പുകളുടെ വലിയ ലോകം
സ്വന്തം ലേഖകൻ