ഈ ജന്മത്തിൽ കണ്ണുകൾ ദാനം ചെയ്താൽ അടുത്ത ജന്മത്തിൽ അന്ധരായി ജനിക്കുമെന്ന് വിശ്വസിക്കുന്നവർ ഇന്നുമുണ്ടെന്നത് അത്ഭുതമായാണ് തോന്നുന്നത്. തീർത്തും അശാസ്ത്രീയപരമാണത്. ഇതുപോലെ ഇനിയുമേറെ തെറ്റിദ്ധാരണകൾ ഉണ്ട്. കണ്ണുകൾ ദാനം ചെയ്താൽ അവരുടെ കണ്ണുണ്ടായിരുന്ന ഇടത്ത് ദ്വാരങ്ങൾ ഉണ്ടാകുമെന്നാണ് നേത്രദാനവുമായി ബന്ധപ്പെട്ട മറ്റൊരു മിഥ്യാധാരണ. കണ്ണിന്റെ കോർണിയ ഭാഗം മാത്രമേ നീക്കം ചെയ്യുന്നുള്ളൂ.. അതിനാൽ മരിച്ചയാളുടെ മുഖത്തിന്റെ രൂപം അതേപടി തുടരുന്നു.
വ്യക്തി മരിച്ച് ആറ് മണിക്കൂറിനുള്ളിൽ അടുത്തുള്ള നേത്രബാങ്കിലേക്ക് വേണ്ടപ്പെട്ടവർ വിളിക്കുകയാണ് വേണ്ടത്. കാറ്റ് കയറാത്ത മുറിയിൽ മരിച്ചയാളെ കിടത്തണം. തലയിണ ഉപയോഗിച്ച് തല ഉയർത്തിയ ശേഷം പോളകൾ പതുക്കെ അടക്കുക. തുടർന്ന്, കണ്ണുകൾക്ക് മുകളിൽ നനഞ്ഞ തുണി വയ്ക്കാൻ പറ്റിയാൽ അത്രയും നല്ലത്. നേത്രദാനം ചെയ്യുന്നതിന് ആരിൽ നിന്നും പണം ഈടാക്കുന്നില്ല. ഒരു ലോക്കൽ ടെലിഫോൺ കോൾ മാത്രമാണ് ചിലവായി വരുക.
